4-nji martda Ýewropa Bileleşiginiň Merkezi Aziýa boýunça täze bellenilen Ýörite wekili Eduards Stipraýs Türkmenistana saparynyň çäklerinde Mejlisiň Başlygy D.Gulmanowa hem-de daşary işler ministri Raşid Meredow bilen duşuşyklary geçirdi.
Mejlisde geçirilen duşuşykda wekiliýet Türkmenistanyň alyp barýan içeri hem-de parahatsöýüjilikli daşary syýasatynyň ileri tutulýan ugurlary we milli Parlamentiň düzümi, alyp barýan işleri bilen tanyşdyryldy.
Taraplar Türkmenistan bilen Ýewropa Bileleşiginiň arasynda soňky ýyllarda gazanylan ylalaşyklaryň, kanun çykaryjylyk we parlament işinde tejribe alyşmagyň, şeýle hem ýurdumyzyň ÝB-niň döwletleri bilen köpugurly gatnaşyklarynyň döwrebap binýadyny kemala getirmäge ýardam edýän parlament wekilleriniň duşuşyklarynyň hem-de bilelikde geçirilýän okuw maslahatlarynyň ähmiýetini bellediler.
Türkmenistanyň Daşary işler ministrliginde geçirilen duşuşygyň başynda Raşid Meredow Stipraýsy jogapkärli wezipä bellenmegi bilen gutlady. Taraplar Türkmenistan bilen Ýewropa Bileleşiginiň arasyndaky özara bähbitli gatnaşyklary, şol sanda Merkezi Aziýa–ÝB formatynyň çäklerindäki hyzmatdaşlygy ösdürmegi dowam etdirmek barada ylalaşdylar.
Şeýle hem Türkmenistanyň ÝB we onuň institutlary bilen alyp barýan hyzmatdaşlygy bilen bagly meseleleriň giň toplumy ara alnyp maslahatlaşyldy.
Taraplar energetika, ulag we arabaglanyşyk, daşky gurşawy goramak, hususan-da metan zyňyndylaryny azaltmak hem-de gaýtadan dikeldilýän energiýa çeşmeleri ýaly ugurlardaky hyzmatdaşlygy ara alyp maslahatlaşdylar.
Taraplar söwda-ykdysady gatnaşyklaryny ösdürmegiň möhümdigini nygtadylar. Şeýle-de ÝB-niň maliýe düzümleri bilen alnyp barylýan özara gatnaşyklara garaldy.
Mundan başga-da, diplomatlar şu ýylda geçirilmegi meýilleşdirilýän bilelikdäki çärelere taýýarlyk görmek meselesini ara alyp maslahatlaşdylar.
