2-nji martda Türkmenistanyň Ýaponiýadaky ilçisi Atadurdy Baýramow Ýaponiýanyň paýtagtynda geçirilen “Tokio marafony - 2025” çäresine gatnaşdy. Bu gezek dünýäniň dürli künjeklerinden jemi 38 müňden gowrak gatnaşyjylary jemlän bu çäre dünýäde iň ähmiýetli hasaplanýan alty marafonyň biridir (World Marathon Majors) diýip, Günüň dogýan ýurdundaky türkmen ilçihanasynda habar berdiler.
Köpçülikleýin habar beriş serişdeleriniň wekillerine beren interwýusynda ilçi A.Baýramow türkmen jemgyýetinde sagdyn durmuş ýörelgelerini berkitmäge, hususan-da ýaşlary bedenterbiýe we sport bilen meşgullanmaga gyzyklanma döretmek ugrunda alnyp barylýan işlere uly ähmiýet berýändiklerini nygtady. Türkmenistanyň döwlet ýolbaşçylarynyň başlangyçlarynyň netijesinde Aşgabatda bu maksatlar üçin ähli şertler döredildi.
Şeýle hem ilçi “Birleşen Milletler Guramasynyň oýunlary” atly kararnamanyň, 3-nji iýuny “Bütindünýä welosiped güni” diýip yglan etmek hakynda kararnamanyň we "Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek” atly kararnamanyň kabul edilmegini dünýä jemgyýetçiliginiň Türkmenistanyň öňe sürýän syýasatyna ýokary baha berýändiginiň aýdyň subutnamasy hökmünde mysal getirdi.
Her ýyl geçirilýän Tokio marafony “World Athletics” guramasy tarapyndan berlen platina derejesine eýedir. Marafonyň uzynlygy 42 km 195 metre barabardyr. Çäräniň hemaýatkäri Tokio şäher häkimligi bolup durýar.
