Belgiýada Tesla elektrik awtoulaglary bilen dünýäniň iň uly yşykly şüweleňi gurnaldy. «Teslarati» neşiriniň maglumatlaryna görä, çärä jemi 1150 sany awtoulag gatnaşdy. Şol bir wagtyň özünde olaryň yzynda onlarça dron asmana galyp, owadan şekilleri we logotipleri emele getirdi.
Bellenip geçilşine görä, Tesla awtoulaglarynyň ýörite bort elektronikasy awtoulaglaryň yşyklandyryşyny saz bilen sinhronlaşdyrmaga mümkinçilik berýär.
Tesla elektrikli awtoulaglarynyň gatnaşmagyndaky köpçülikleýin yşykly şüweleňler 2023-nji ýyldan bäri gurnalyp gelinýär. Bu gezekki rekorda programmist we dizaýner Saýmon Pollok ýolbaşçylyk etdi. Ol mundan öň hem şeýle rekord goýup, 2023-nji ýylyň noýabr aýynda Finlýandiýada 687 awtoulag bilen şüweleň gurnapdy. Bu gezek ol özüniň öňki rekordyndan-da geçmegi başardy.
Pollok özüniň häzirki rekordyndan hem geçmek isleýändigini mälim etdi. Nobatdaky yşykly şüweleňiň 30-njy martda ABŞ-nyň Tennessi ştatynda geçirilmegi meýilleşdirilýär.
Tesla kompaniýasy şu ýyl üçin birnäçe täzelikleri yglan etdi. Model Y we Cybertruck täze modifikasiýalar alar, şeýle-de Model S we Model X hem täzelener. Bulardan başga-da has elýeterli täze Model Q-nyň tanyşdyrylmagyna garaşylýar.
