Lego we Koenigsegg kompaniýalary hyzmatdaşlygyň çäginde «Sadair’s Spear» ekstremal trek giperkaryny jikme-jik gaýtalaýan «Koenigsegg Sadair’s Spear Megacar» toplumyny taýýarladylar. Bu ulag markanyň esaslandyryjysynyň kakasynyň soňky çapuw atynyň hormatyna atlandyrylyp, 2025-nji ýylyň «Koenigsegg Jesko» modeliniň modifikasiýasydyr. Lego kubiklerinden ýasalan Koenigsegg nusgasy 111 km/sag tizlige galdy.
1:8 masştabyndaky toplum 4104 bölekden (detal) ybarat bolup, ýewropada iýul aýynda 450 ýewro bahasy bilen satuwa çykar.
Uzunlygy 59 santimetr bolan model garaşsyz asma ulgam, hereket edýän porşenleri bolan «V8» hereketlendirijisi, işleýän rul, epilýän aýnalar, aýrylyp bilinýän üçek we 9 basgançakly geçiriş gutusy bilen üpjün edilendir. Ýörite mehanizm gapylary sinhron açmaga, kapoty galdyrmaga we görkeziş tertibi üçin aýnalary epmäge mümkinçilik berýär.
Belläp geçmek gerek, mundan ozal, maý aýynda «Lego» «Speed Champions» seriýasyny «Forsaž» filminden 1994-nji ýylyň «Toyota Supra MK4» modeli bilen hem baýlaşdyrypdy.
Hyzmatdaşlygyň esasy wakasy giperkaryň tebigy ululykdaky hereket edýän nusgasynyň döredilmegi boldy. Maşyny gurmak üçin 9400 adam-sagadyndan gowrak wagt we 327 906 sany «Lego» bölegi sarp edildi. Konstruksiýanyň umumy agramy 1800 kilograma deň bolup, onuň 400 kilogramyny metal karkasda berkidilen kubikleriň özleri düzýär. Yzky okunda işleýän elektrodwigatel oturdylandyr.
Britaniýanyň Gudwud (Goodwood) ýolunda geçirilen synaglaryň dowamynda synag-pýlot Markus Lund «Lego»-mobilini 111 km/sag tizlik bilen sürmegi başardy. Bu netije konstruktordan ýasalan doly ululykdaky modeller üçin ozal bellenen 50 km/sag tizlik rekordyndan iki esse ýokarydyr.
