Ford GT Mk IV superkary “Nýurburgring-Nordşlýaf” ýolunda iň çalt gibrid däl içinden otlanýan hereketlendirijili awtoulag boldy. Ford bu barada Germaniýada geçirilen 21 kilometrlik ýaryşlaryň netijelerini jemleýän mahaly yglan etdi.
Rekord goýan ýaryşyň ýazgysy YouTube platformasynda çap edildi.
Ulag aýlawy 6 minut 15,977 sekuntda geçmek bilen, ýaryşyň taryhynda üçünji iň çalt wagt boldy. Ruluň başynda belgiýaly sürüji Frederik Werwiş otyrdy.
Awtoulag aýlaw wagtynda diňe iki prototipden: Porsche 919 Evo-dan (5 minut we 19,546 sekunt) we elektrikli Volkswagen ID.R-den (6 minut we 5,336 sekunt) yza galdy.
Şeýle hem, Ford GT Mk IV bu ýolda bäsleşen iň çalt amerikan awtoulagy boldy. Seriýa modelleriniň arasynda 2024-nji ýyldan bäri iň gowy netije 6 minut 29,05 sekunt bilen gibrid Mercedes-AMG One awtoulagyna degişlidir.
Ford superkary birnäçe elektrik modellerinden, şol sanda ýoly 6 minut 22,091 sekuntda geçen Xiaomi SU7 Ultra Prototype-den we 6 minut 24,047 sekuntda geçen Lotus Evija-dan öňe geçdi. Benzin bilen işleýän önümçilik awtoulaglarynyň arasynda iň ýakyn netijäni Manthey kompaniýasynyň Porsche 991 GT2 RS awtoulagy 6 minut 43,3 sekunt wagt bilen gazandy.
Ford GT-niň ýol wersiýasynyň önümçiligi birnäçe ýyl mundan ozal togtadylypdy, ýöne diňe trassa üçin niýetlenen Mk IV awtoulagynyň öndürilişi dowam edýär. Her biriniň bahasy 1,7 million dollardan başlaýan awtoulagy çäklendirilen 67 birlik möçberinde öndürmek meýilleşdirilýär. Model 831 at güýjüne eýe bolan 3,8 litrlik iki turbinaly EcoBoost V6 hereketlendirijisi we alty tizlikli yzygiderli geçiriji bilen üpjün edilen.
