5-nji fewralda Duşenbe şäherinde «Merkezi Aziýa – Ýewropa Bileleşigi» görnüşindäki Owganystan boýunça ýörite wekilleriň altynjy duşuşygy geçirildi. Bu barada Türkmenistanyň DIM-nde habar berdiler.
Mejlisde türkmen wekiliýetine Türkmenistanyň daşary işler ministriniň orunbasary Ahmet Gurbanow ýolbaşçylyk etdi. Ol duşuşyga gatnaşyjylary türkmen tarapynyň Owganystanyň ykdysadyýetini dikeltmek boýunça alyp barýan işleri bilen tanyşdyrdy.
Duşuşygyň dowamynda sebit howpsuzlygy we ösüşiň ileri tutulýan meseleleri, şeýle hem Owganystandaky durmuş-ykdysady ýagdaýlar barada düýpli pikir alşyldy.
Bu gezekki duşuşyk Owganystandaky wakalar we ykdysady ýagdaý barada maglumat alyşmaga, şeýle hem özara gyzyklanma bildirilýän ugurlarda mundan beýläkki hyzmatdaşlygy ara alyp maslahatlaşmaga mümkinçilik döretdi.
Taraplar Owganystany durnukly, asuda we gülläp ösýän ýurda öwürmek meselesinde ygrarlydyklaryny mälim etdiler we halkara jemgyýetçiliginiň Owganystanyň halkyna goldaw bermegi dowam etdirmek ugrundaky tagallalaryny tassykladylar.
Duşuşykda Owganystany ykdysady taýdan durnuklylaşdyrmak we dikeltmek mümkinçilikleri ara alnyp maslahatlaşyldy, şeýle hem ykdysady işjeňlik, maliýe we bank pudagy üçin amatly şertleri döretmegiň we Owganystandaky durmuş-ykdysady infrastrukturany dikeltmegiň ähmiýeti bellenildi.
Duşuşyga gatnaşyjylar «Merkezi Aziýa – Ýewropa Bileleşigi» formatynyň çäginde dialogy we hyzmatdaşlygy dowam etdirmegiň zerurdygyny bellediler we Owganystandaky syýasy, ykdysady we ynsanperwer ýagdaýlary durnuklaşdyrmak üçin halkara jemgyýetçiliginiň – dünýäniň döwletleriniň, esasanam Merkezi Aziýa sebitiniň, abraýly halkara düzümleriniň tagallalaryny birleşdirmegiň zerurdygy barada umumy pikiri beýan etdiler.
