Gazagystanda türkmen tarapyndan maýa goýumlarynyň gatnaşmagynda 100-e golaý kompaniýa iş alyp barýar. Bu barada Gazagystanyň premýer-ministriniň orunbasary, daşary işler ministri Murat Nurtleu Türkmenistanyň daşary işler ministri Raşid Meredow bilen geçirilen gepleşiklerden soň metbugat wekilleriniň öňünde eden çykyşynda aýtdy. Muny Kazinform agentligi ýetirýär.
Murat Nurtleu şeýle hem ulag-üstaşyr pudakda hyzmatdaşlygy pugtalandyrmak meýilnamalary barada aýtdy.
«Türkmen kapitalynyň gatnaşmagynda Gazagystanda takmynan 100 kompaniýa hereket edýär. Biziň gatnaşyklarymyzyň ýene bir möhüm ugry bolan ulag-üstaşyr ulgamynda gatnaşyklarymyzy has hem çuňlaşdyrmaga aýratyn üns berýäris. Bu ugurda strategik hyzmatdaşlygyň ýola goýlandygyny bellemek isleýärin» diýip, Nurtleu nygtady.
Nurtleu Aziýany Ýewropa we Ýakyn Gündogar bilen baglanyşdyrýan ugurlaryň ösdürilmeginiň ýurtlarymyzyň halkara jemgyýetçiligindäki ornuny pugtalandyrýandygyny aýtdy.
«Şol bir wagtda, Gazagystan-Türkmenistan-Eýran demir ýolunyň artykmaçlyklaryny netijeli peýdalanmak möhüm strategik ädimleriň biri bolar. Häzirki wagtda kuwwaty barha artýan Hytaý-Gazagystan-Türkmenistan-Eýran demir ýol magistralynyň ösdürilmegi hem özara bähbitli bolup, halkara söwdasyna täze itergi berýär. Mundan başga-da, biziň gazak, türkmen we rus demir ýol guramalarynyň Demirgazyk-Günorta geçelgesi boýunça üçtaraplaýyn hyzmatdaşlygyny giňeltmek babatdaky bähbitlerimiz hem birleşýär» diýip, Gazagystanyň daşary işler ministri belledi.
Ol şeýle hem bu meseleleriň şu ýyl geçiriljek ulag we logistika boýunça iş toparynyň mejlisinde jikme-jik ara alnyp maslahatlaşyljakdygyny aýtdy.
