Ilon Maskyň eýeçiligindäki X sosial tory (öňki Twitter) täze funksiýany – gysga wideo lentasyny işe girizýär. Täze funksiýa ABŞ-daky ulanyjylar üçin elýeterli bolup, meşhur hytaý platformasy bolan TikTok-a meňzeş mazmuny hödürleýär diýip, TechCrunch neşiri habar berýär.
TikTok-yň ABŞ bazaryndaky soňky «dartgynly» ýagdaýyny göz öňünde tutup, X bu mümkinçiligi elden gidermek islemeýär. Statistikalara görä, TikTok platformasyny takmynan 170 million amerikan işjeň ulanýardy. X-da wideo lentasynyň işe girizilmegindäki maksat, bu ulanyjylar köplügini pursatdan peýdalanyp öz tarapyna çekmekdir.
«Şu gün ABŞ-nyň ulanyjylary üçin täze, gyzykly wideo hyzmaty elýeterli bolýar» diýip, X-iň işläp düzüjileri aýdýarlar.
Belläp geçsek, bu kompaniýanyň şuňa meňzeş funksiýany ornaşdyrmak boýunça ilkinji synanyşygy däldir. Öň hem X gysga wideolary synap gördi, emma indi olar resmi taýdan goşundy bilen birleşdirildi.
ABŞ-da TikTok bilen bagly meseleler henizem doly ýagdaýda çözülenok. Hytaý platformasyna, ABŞ-daky paýynyň 50%-ini satmak baradaky hökümet talabyny ýerine ýetirmek üçin 75 günlük möhlet berildi. ABŞ-nyň täze saýlanan prezidenti Donald Tramp, döwlet baştutany hökmünde wezipesine başlan ilkinji güni degişli karara gol çekdi.
Platformanyň mümkin bolan satyn alyjylarynyň arasynda öň Ilon Mask bilen Mr.Beast ady bilen tanalýan, YouTube-yň iň meşhur blogeri Jimmi Donaldsonyň ady tutulýardy.
The Verge-iň bellemegine görä, sosial ulgamyň takmynan 12 sagat dowam eden gadaganlygy App Store-yň iň meşhur goşundylarynyň sanawyna uly täsir ýetirdi. Sanawyň ilkinji 20-ligine blokirlemäni aýlap geçýän hyzmatlar we beýleki gysga wideo platformalary bolan Likee, Flip we Triller girýär.
Şeýle-de, hytaý bazary üçin döredilen sosial ulgam RedNote, çalt meşhurlyk gazandy. Birnäçe günüň dowamynda «TikTok-dan göçüp baran» milliondan gowrak ulanyjy şol ýere geçdi. Şol bir wagtyň özünde, RedNote täze ulanyjylaryň garaşylmadyk akymyna zordan ýetişýär: işläp düzüjiler iňlisçe gepleýän mazmun moderatorlaryny işe alýandyklaryny yglan etdiler. Esasy bäsdeşleriň biri bolan Instagram hem ABŞ-da TikTok-yň ornuny doldurmak üçin, Reels-iň dowamlylygyny 3 minuda çenli ýokarlandyrdy.
