Dünýäde iň meşhur wideo bloger MrBeast (hakyky ady – Jimmi Donaldson) TikTok platformasyny satyn almak mümkinçiligine seredýär, ol şeýle etmek bilen wideo platformasynyň ABŞ-da gadagan edilmeginiň öňüni almak isleýär. Bu barada ol X akkauntynda habar berdi.
“Ýeri, bolýar, men TikTok-y gadagan edilmezligi üçin satyn alaryn” – diýip, YouTube blogeri postlaryň birinde ýazdy.
Ol muny ilkibaşda degişme hökmünde ýazan bolmagy hem ähtimal. Ýöne birneme soň ol has çynlakaý habarlar bilen bu postuň üstüni ýetirdi. Ol twitden soň özi bilen uly işewürleriň habarlaşandygyny aýtdy.
“Oýun edemok, twitden soň meniň bilen birnäçe milliarder habarlaşdy. Belki, bize nämedir bir zat etmek başardar” – diýip, ol belledi.
Amerikan häkimiýetleriniň çözgüdine laýyklykda, TikTok ýurtda 19-njy ýanwarda petiklener. Bu ulanyjy maglumatlarynyň Hytaý hökümetiniň bähbitleri üçin ulanylyp bilinmegi bilen baglanyşyklydyr. Platformany işläp düzüjiler şeýle aýyplamalary ret edýär we ABŞ-nyň Ýokary kazyýetinde çözgüdiň ýatyrylmagyny gazanmaga çalyşýar. Ýöne kazylaryň amerikan hökümetiniň delilleri bilen ylalaşmaga ýykgynlydygy barada maglumatlar peýda boldy.
Öň, hytaý häkimiýetleriniň ABŞ-nyň çäginde sosial ulgamy dolandyrmagy milliarder Ilon Maska tabşyrmak mümkinçiligini gözden geçirýändigi habar berildi.
