Hytaýyň häkimiýeti TikTok-nyň ABŞ-daky şahamçasyny Ilon Maska satmagy we şeýdip programmanyň gadagan edilmeginiň öňüni almagy maslahatlaşýarlar diýip, Bloomberg habar berýär.
ABŞ-nyň Ýokary kazyýeti TikTok-nyň düýbi Hytaýda ýerleşýän ByteDance-den aýrylmagyny talap edýän kanunyň üstünde işleýär. Eger bu kanun güýje girse, TikTok ABŞ-da gadagan edilip bilner. Hytaý häkimiýeti sosial toruň ByteDance-de galmagyny isleýärler, ýöne eger zerur bolsa, ABŞ-daky dolandyryşy Ilon Maska bermek pikirini hem göz öňünde tutýarlar.
Mask Hytaý bilen aragatnaşygy gowy telekeçi hökmünde häzirki ýagdaýda iň amatly çykalga bolup görünýär. Onuň iň iri Tesla zawody Hytaýda ýerleşýär. Şeýle-de, TikTok-daky maglumatlar Ilon Maskyň emeli aň bilen iş alyp barýan xAI kompaniýasy üçin hem peýdaly bolup biler.
TikTok-dan paýnamalarynyň belli bir bölegini satmagyny talap edýän kanun 2024-nji ýylda güýje giripdi. Kanunyň tarapdarlary sosial toruň ABŞ-nyň milli howpsuzlygyna howp döredýändigi baradaky pikirleri öňe sürýär. TikTok bolsa muny inkär edip, söz azatlygynyň bozulýandygyny belleýär.
TikTok Mask bilen bagly gürrüňleri düýbünden ret edýär we “toslama” diýip atlandyrýar. Ilon Mask bolsa bu meselede düşündiriş bermekden ýüz öwürýär.
