ABŞ-nyň Ýokary kazyýeti ýurtda TikTok-y işlemegini gadagan etmek baradaky kararyny gijikdirmese ýa-da ýatyrmasa, programma 2025-nji ýylyň 19-njy ýanwaryndan başlap ABŞ-da işlemegini bes edip biler diýip, Hypebeast portaly ýatladýar.
2024-nji ýylyň aprelinde prezident Jo Baýden düýbi Hytaýda ýerleşýän ByteDance kompaniýasyndan TikTok-daky paýyny satmagyny talap edýän kanuna gol çekdi, çünki ABŞ-nyň hökümeti bu platforma milli howpsuzlyga howp salýar diýip hasaplaýar. Bu iş boýunça kazyýet diňlenşikleri 10-njy ýanwarda başlandy.
Euronews-yň maglumatlaryna görä, ABŞ-nyň Ýokary kazyýeti, megerem, TikTok wideo akymy platformasynyň ABŞ-da işlemegini gadagan edýän kanuny goldasa gerek. Milli howpsuzlyga salynýan howp baradaky deliller TikTok-nyň ýa-da ABŞ-nyň 170 million ulanyjysynyň söz azatlygynyň çäklendirilmegi baradaky ätiýaçlanmalardan üstün gelýär. ABŞ-nyň hökümeti TikTok-y "Hytaýyň troýa aty" diýip atlandyrýarlar.
Ýokary kazyýetiň başlygy Jon Robertsiň sözlerine görä, esasy mesele platformanyň Hytaýyň ByteDance kompaniýasyna degişlidigi we Hytaýyň hökümeti bilen hyzmatdaşlyk etmek talaby bilen bagly.
TikTok-nyň eýeleri hem öz gezeginde ulanyjylaryň maglumatlaryny goramakda günbatarly bäsdeşlerinden has köp tagalla edýändiklerini hem-de howpuň YouTube-yňkydan ýa-da Instagram-yňkydan uly däldigini öňe sürýärler.
Kanun güýje girse, TikTok amerikan ulanyjylarynyň enjamlaryndan düýbünden ýok bolup gitmez, emma programmany täzelemek ýa-da göçürip almak mümkinçiligini ýitirerler. Bu platformanyň meşhurlygyna we girdejisine täsir eder.
Kompaniýa hatda gysga möhlete ýapylmagyň hem uly zyýan ýetirip biljekdigini duýdurýar – işläp düzüji bir aýyň içinde gündelik ulanyjylarynyň üçden birini ýitirip biler we mahabat girdejisi ep-esli azalar.
Ondan öň ABŞ-nyň saýlanan prezidenti Donald Tramp kazyýete ýagdaýy çözmek üçin täze administrasiýa wagt bermegini sorapdy. Kazylaryň bu ýüzlenmäni göz öňünde tutjagy-tutmajagy entek belli däl.
