Halkara iş topary, semizlik düşünjesine täzeden seretmegi we anyklaýyşda diňe beden agram indeksine (BAI) bil baglamazlygy maslahat berýär. Iş toparynyň netijeleri, The Lancet Diabetes & Endocrinology žurnalynda çap edildi.
Bütindünýä Saglygy Goraýyş Guramasynyň (BSGG) wekillerini hem öz içine alýan bilermenler topary, diňe BAI-ne esaslanýan häzirki düşünjäniň ýagdaýlaryň dürlüligini doly beýan etmeýändigini we nädogry netijelere alyp gelýändigini bellediler. Iş topary semizligi iki görnüşe bölmegi teklip etdi: kliniki we dokliniki.
Kliniki semizlik – bu artykmaç ýag dokumasy sebäpli agzalaryň we beýleki dokumalaryň işiniň bozulmagy bilen bagly dowamly keseldir.
Dokliniki semizlik – bu bedende köp mukdarda ýag bolup, agzalaryň işiniň bozulmadyk ýagdaýdyr. Şeýle-de bolsa, bu ýagdaý kliniki semizligiň we beýleki keselleriň döremegine we ösmegine bolan howpy ýokarlandyrýar.
Iş topary BAI-ni diňe umumy töwekgelçiligi bahalandyrmak üçin ulanyp bolar diýip maslahat berýär. Emma belli bir adamda semizligi anyklamak üçin goşmaça faktorlary, ýagny ýag dokumalarynyň möçberini ýa-da biliň daşynyň ululygyny, şeýle hem ýaşy, jynsy we etniki gelip çykyşy göz öňünde tutmaly. Semizlik anyklanylanda, onuň görnüşini kesgitlemek üçin goşmaça barlaglar zerurdyr.
Kliniki semizlik bilen ýaşaýan adamlara bejergi gerek, dokliniki semizlik bilen ýaşaýanlara bolsa öňüni alyş çäreleri üçin maslahat we gözegçilik gerek.
