BMG-niň Ösüş Maksatnamasy (ÖM) Saglygy goraýyş we derman senagaty ministrligi bilen bilelikde durmuşa geçirýän «Türkmenistanyň kliniki-barlaghana gullugyny güýçlendirmek» atly taslamanyň çäginde laboratoriýa enjamlarynyň, reaktiwleriň we sarp ediş serişdeleriniň nobatdaky tapgyryny Türkmenistana gowşurdy.
BMGÖM-niň metbugat beýannamasyna görä, umumy gymmaty 586 müň amerikan dollaryndan gowrak bolan bu ýüke stol üsti sentrifugalar, gany almak üçin bir gezeklik probirkalar we kliniki-laboratoriýa barlaglaryny geçirmek üçin giň gerimli reaktiwler toplumy girdi. Olaryň arasynda ganyň umumy we biohimiki derňewi, koagulogramma (ganyň lagtalanmagy) üçin reaktiwler, şeýle hem B we C wirusly gepatitleri anyklamak üçin IFA (immunoferment analizi) test-toplumlar bar.
Bu enjamlar we serişdeler ýurduň ähli ýerindäki kliniki barlaghanalara paýlanar.
Türkmenistanyň Hökümeti tarapyndan maliýeleşdirilýän bu taslama, kliniki-barlaghana gullugyny döwrebaplaşdyrmaga, laboratoriýalaryň durnukly işlemegini üpjün etmäge hem-de etraplarda, şäherlerde, welaýat merkezlerinde we paýtagtda anyklaýyş hyzmatlarynyň derejesini, hilini we elýeterliligini ýokarlandyrmaga gönükdirilendir.
