28-nji dekabr rus tarapynyň başlangyjy boýunça Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko bilen telefon arkaly söhbetdeş boldy.
Söhbetdeşligiň dowamynda 2025-nji ýylda özara hyzmatdaşlygyň geljegi barada pikir alşyldy. 2025-nji ýyl BMG-niň Baş Assambleýasy tarapyndan Türkmenistanyň başlangyjy boýunça “Halkara parahatçylyk we ynanyşmak ýyly” diýlip yglan edildi. Şunuň bilen baglylykda, ählumumy syýasata dialog we hormat goýmak medeniýetini gaýtaryp getirmekde dünýä jemgyýetçiliginiň tagallalaryny birleşdirmegiň möhümdigine üns çekildi.
Gurbanguly Berdimuhamedow Walentina Matwiýenko Merkezi Aziýa döwletleriniň we Russiýanyň zenanlarynyň ikinji dialogyny geljek ýylyň maýynda Hazar deňziniň türkmen kenaryndaky «Awaza» milli syýahatçylyk zolagynda geçirmek mümkinçiligine seretmegi teklip etdi. Bu möhüm çäre Hazar deňziniň parahatçylyk, ylalaşyk, hoşniýetli goňşuçylyk we netijeli hyzmatdaşlyk deňzi, duşuşyklaryň, dialogyň, özara düşünişmegiň ýeri hökmündäki taryhy ornuny nobatdaky gezek tassyklar.
Söhbetdeşligiň barşynda türkmen halkynyň Milli Lideri dostlukly ýurtlarymyzyň arasyndaky hyzmatdaşlygy täze derejelere çykarmak üçin mundan beýläk-de tagalla etmäge taýýardygyny tassyklady.
Belläp geçsek, Merkezi Aziýa döwletleriniň we Russiýanyň zenanlarynyň birinji dialogy 2022-nji ýylda Türkmenistanda üstünlikli geçirildi.
