Prezident Serdar Berdimuhamedow Halk Maslahatynyň Başlygy Gurbanguly Berdimuhamedowy Türkmenistanyň «Magtymguly Pyragynyň 300 ýyllygyna» atly ýubileý medaly bilen sylaglamak hakynda Permana gol çekdi. Resminama metbugatda çap edildi.
Resminamada bellenilişi ýaly, bu medal türkmen halkynyň Milli Liderine Magtymguly Pyragynyň döredijiliginiň bütindünýä medeni gymmatlyklarynyň hatarynda, dünýä halklarynyň edebiýatynda, jemgyýetçilik durmuşynda tutýan ornuny öwrenmek boýunça ýurdumyzyň we daşary ýurtlaryň alymlarynyň, döredijilik işgärleriniň, dünýä jemgyýetçiliginiň tagallalaryny birleşdirmekde, halkara ylmy maslahatlary geçirmekde, ýurdumyzda ylmy, medeniýeti, edebiýaty ösdürmekde, öz ýiti zehininden we jöwher paýhasyndan dörän ençeme eserleri, «Pähim-paýhas ummany Magtymguly Pyragy» atly meşhur goşgusy bilen halkymyzyň döredijilik ruhuny, şahyryň abraý-mertebesini dabaralandyrmakda, «Magtymguly Pyragy» medeni-seýilgäh toplumyny, şahyryň belent ýadygärligini bina etmekde bitiren hyzmatlaryny, türkmen halkyny bagtyýar durmuşda ýaşatmak ugrunda edýän bimöçber tagallalaryny göz öňünde tutup berildi.
Şeýle hem Türkmenistanyň Halk Maslahatynyň wekillerinden, ýurdumyzyň iri jemgyýetçilik birleşiklerinden, zähmetkeşler toparlaryndan we raýatlarymyzdan gelip gowşan teklipler göz öňünde tutuldy.
