Geçen hepdede Türkmenistanyň Döwlet haryt-çig mal biržasynyň (TDHÇMB) söwdalarynda geleşikleriň 26-sy hasaba alyndy. Söwdalaryň netijeleri boýunça daşary ýurt maýasyna nebitgaz, himiýa we dokma önümleri ýerlenildi diýip, TDH habar berýär.
Türkiýäniň, Birleşen Arap Emirlikleriniň, Owganystanyň, Täjigistanyň, Ukrainanyň we Özbegistanyň işewür toparlarynyň wekilleri daşary ýurt puluna «Türkmennebit» döwlet konserniniň kärhanasynda öndürilen suwuklandyrylan gazy, şeýle-de «Türkmenhimiýa» döwlet konserniniň kärhanasynda öndürilen ECO-93 kysymly awtobenzini satyn aldy.
Mundan başga-da, daşary ýurt puluna Türkiýäniň, Birleşen Arap Emirlikleriniň we Şweýsariýanyň telekeçilerine nah ýüplük, pagta süýümi we pagta ýagy ýerlenildi. Halkara söwdalaryň çäklerinde gazanylan bu geleşikleriň jemi bahasy ABŞ-nyň 58 million 571 müň dollaryndan gowrak boldy.
Ýurdumyzyň işewürleri hem içerki bazar üçin jemi bahasy 885 müň manada deň bolan nah matany satyn aldy.
