Birleşen Milletler Guramasynyň Baş Assambleýasynyň 79-njy sessiýasynyň dowamynda Türkmenistanyň başlangyjy bilen «Merkezi Aziýada ýadro ýaragyndan azat zolak hakyndaky Şertnama» atly Kararnama biragyzdan kabul edildi. Türkmenistanyň Halk Maslahatynyň Başlygy Gurbanguly Berdimuhamedow bu hoş habar bilen Türkmenistanyň Prezidentini gutlady.
"Siziň ynsanperwer daşary syýasatyňyzyň netijesinde häzirki döwürde ýurdumyzyň hemişelik Bitaraplyk hukuk ýagdaýy hil taýdan täze derejä çykýar. Türkmen Bitaraplygynyň sebitdäki, şeýle hem dünýä derejesindäki ähmiýeti barha artýar. Bu gün Siziň döwletleriň arasynda parahatçylyk we ynanyşmak medeniýetini berkitmäge gönükdirilen çagyryşlaryňyz gymmatly başlangyç hökmünde halkara bileleşikde giň goldawa eýe bolýar" diýip, türkmen halkynyň Milli Lideri belleýär.
Gurbanguly Berdimuhamedow şeýle hem gutlag hatynda şu ýylyň oktýabrynda BMG-niň Baş Assambleýasynyň 79-njy sessiýasynda Türkmenistanyň başlangyjy bilen «Merkezi Aziýa — parahatçylyk, ynanyşmak we hyzmatdaşlyk zolagy» atly Kararnamanyň biragyzdan kabul edilendigini belledi.
"Milletler Bileleşigine agza ýurtlaryň köpüsiniň Bitarap Türkmenistanyň bu başlangyjyny goldamagy, sebitdäki hemme ýurtlaryň oňa awtordaş hökmünde çykyş etmegi ýurdumyz üçin uly abraýdyr, «Açyk gapylar» syýasatyny alyp barýandygymyzyň aýdyň güwäsidir. Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkeziniň alyp barýan işleri, şol sanda Merkezi Aziýa döwletleriniň Baştutanlarynyň konsultatiw duşuşyklarynyň, Merkezi Aziýa ýurtlarynyň zenanlarynyň dialogynyň formatynyň yzygiderli berkidilmegi, Arkadag şäherinde «Dialog — parahatçylygyň kepili» atly halkara ýaşlar forumynyň geçirilip, Merkezi Aziýanyň ýaşlar forumynyň döredilmegi bäş dostlukly ýurduň arasyndaky gatnaşyklary has-da berkitdi" diýip, Türkmenistanyň Halk Maslahatynyň Başlygy belledi.
