Hytaýyň DEEPRobotics kompaniýasy gysga wideo arkaly täze dört aýakly Lynx robotynyň mümkinçiliklerini görkezdi. Terjime edilende, onuň ady “garagulak” diýmekdir. Ol tigirler bilen enjamlaşdyrylan hem-de pyýada ýöremek we sürülmek režimlerine geçip bilýär diýip, “Wokrug sweta” neşiri habar berýär.
Robot it beýikli-pesli ýerlerde we ýabany tebigat şertlerde işlemek üçin niýetlenendir. Çylşyrymly landşaftlar aglaba robot öndürijileriň iki aýakly we dört aýakly modelleri üçin esasy kynçylyk bolmagynda galýar. Şeýle-de bolsa, DEEPRobotics -iň işläp taýýarlaýjylary Lynx-y kyn ýerlere uýgunlaşdyryp, tigirleriň kömegi bilen bu meseläni çözdüler.
“DEEPRobotics müşderilerimiz üçin çeýeligiň, öndürijiligiň täze derejesini açýan, ulanylyşda aňsat orta ölçegdäki dört tigirli çözgüdi tiz wagtda hödürlemekçi bolýar. Geliň, robotlaryň gazanyp biljek zatlarynyň çäklerini kesgitläliň" - diýip, kompaniýanyň wekili Maks Wu belledi.
Wideoýazgylarda Lynx-yň ýapgytlara çykmaga, dik depelerden aşak inmäge we metrläp uzynlykdaky harsaňlary we beýikligi 80 santimetre ýetýän päsgelçilikleri ýeňip geçmäge ukyplydygy görkezilýär. Robot öň ýa-da art aýaklarynda durup bilýär, bu bolsa oňa dar ýerlerde hereket etmäge we salto ýaly, çylşyrymly hokgalary ýerine ýetirmäge mümkinçilik berýär.
Kompaniýa resmi tanyşdyryş dabarasynda modeliň goşmaça aýratynlyklaryny açmagy wada berýär. Lynx gözleg we halas ediş işlerinde, kartalaşdyrmak we enjamlary daşamakda, şeýle hem beýleki DEEPRobotics modelleriniň eýýäm ulanylýan senagat desgalarynda ulanylyp bilner diýlip garaşylýar.
