Goşmaça 46 minut uky umumy özüňi duýşuňy has gowulaşdyryp, jemgyýete peýda getirýän hereketleri alyp barmaga ýardam edýär. Tehasyň Beýlor uniwersitetiniň ylmy gözlegçileri muny 90 sany ýaş adamyň gatnaşmagynda geçirilen tejribede subut etdiler.
Gatnaşyjylara tötänleýin ýagdaýda uky üçin dürli wagt bellenildi – gijräk, irräk ýa-da adaty. Bir hepdäniň dowamynda ylmy gözlegçiler ukynyň dowamlylygyndaky üýtgeşmeleriň gatnaşyjylaryň psihiki saglygyna nähili täsir edýändigine gözegçilik etdiler.
“Adatdakysyndan 46 minut köp ýatan adamlar ahyrynda ýokary psihiki durnuklylygy, minnetdarlyk, durmuşdan kanagatlanma we düşünjelilik duýgusyny görkezdiler” – diýip, ylmy gözlegiň awtorlarynyň biri belledi.
Goşmaça uky adamlara özüni diňe bir fiziki taýdan däl, eýsem emosional taýdan has gowy duýmaga kömek etdi. “Dowamly uky günüň dowamynda ýönekeý bir gujurlylyk duýgusyndan has uly täsire eýedir. Ol size öz durmuşyňyza has gowy düşünmäge we geljekki synaglara has çydamly bolmaga kömek edýär” – diýip, alym belledi.
Munuň tersine, ukusy günde 37 minut azaldylan gatnaşyjylar şähdiň bozulmagyny we dartgynlylyga durnuklylygyň peselmegini başdan geçirdiler. Bu uky ýetmezçiliginiň adamyň durmuşy kabul edişine we gündelik kynçylyklardan baş çykaryp bilmek ukybyna ýaramaz täsir edip bilýändigini delillendirýär.
Mundan başga-da, alymlar ukusy ýeterlik derejede bolan adamlaryň jemgyýete peýda getirýän hereketleri ýerine ýetirmäge ymtylýandygyny anykladylar: olar haýyr-sahawat işlerine we raýat başlangyçlaryna gatnaşmaga uly isleg bildirýärler.
