Prezident Serdar Berdimuhamedow Türkmenistanyň halkynyň we Hökümetiniň adyndan, şeýle hem hut öz adyndan Türkiýe Respublikasynyň Prezidenti Rejep Taýyp Ärdogana we Türkiýäniň doganlyk halkyna milli baýram — Respublika güni mynasybetli mähirli gutlaglaryny, iň gowy arzuwlaryny iberdi diýip, TDH habar berýär.
Döwlet Baştutany Türkiýe Respublikasy bilen köpugurly hyzmatdaşlygy gyşarnyksyz berkitmegiň Türkmenistanyň daşary syýasatynyň ileri tutulýan ugurlarynyň biri bolup durýandygyny belläp, taryhyň synagyndan geçen türkmen-türk doganlyk gatnaşyklarynyň bu gün baý tejribä eýedigini we syýasy, ykdysady, medeni-ynsanperwer ugurlardaky ileri tutulýan wezipeleriň üstünlikli amala aşyrylmagynyň berk binýadyny emele getirýändigini nygtady. Şeýle-de hormatly Prezidentimiz ikitaraplaýyn hyzmatdaşlygy uzak möhletleýinlik, ynanyşmak ýörelgeleri esasynda halklarymyzyň bähbidine mundan beýläk-de ösdürmek üçin ähli tagallalaryň ediljekdigini tassyklady.
Döwlet Baştutany Prezident Rejep Taýyp Ärdogana tüýs ýürekden berk jan saglyk, bagtyýarlyk, jogapkärli döwlet işinde üstünlikleri, Türkiýäniň doganlyk halkyna bolsa parahatçylyk, abadançylyk we gülläp ösüş arzuw etdi.
Türkiýede Respublika güni her ýylyň 29-njy oktýabrynda bellenilýär. Ol 1923-nji ýylda Respublikanyň yglan edilmeginiň hormatyna baýram edilýär. Şol gün Türkiýäniň Konstitusiýasyna üýtgetmeler girizilip, Osman imperiýasyna derek Türkiýe döwleti döredilýär.
