Türkmenistan BMG-niň Ýewropa ykdysady komissiýasy bilen ýaşyl we durnukly energetika, metanyň zyňyndylaryny azaltmak ugurlarynda hyzmatdaşlygy ösdürmek meselelerini maslahatlaşýar. Bu barada 22-nji oktýabrda Türkmenistanyň DIM-nde BMG-niň Ýewropa ykdysady komissiýasynyň Durnukly energetika bölüminiň direktory Dario Liguti bilen geçirilen duşuşykda bellenilip geçildi.
Türkmenistanyň DIM-niň habar bermegine görä, duşuşygyň dowamynda taraplar Türkmenistanyň BMG-niň Ýewropa ykdysady komissiýasy bilen özara gatnaşyklarynyň häzirki ýagdaýyny hem-de hyzmatdaşlygy ösdürmegiň geljegini ara alyp maslahatlaşdylar.
Ählumumy energetika howpsuzlygy we durnukly ösüş boýunça hyzmatdaşlygyň bileleşigini döretmek barada Türkmenistanyň başlangyjynyň ähmiýeti nygtaldy. Bu başlangyç Bütindünýä hökümet sammitinde öňe sürüldi we Türkmenistanyň BMG-niň Baş Assambleýasynyň 79-njy sessiýasynyň çäginde ileri tutulýan garaýyşlarynyň hatarynda görkezildi.
Gepleşigiň çäginde BMG-niň Ýewropa ykdysady komissiýasynyň gün we ýel energiýasy babatda bilermenlik goldawy, şeýle hem energiýany saklamak we geçirmek üçin öňdebaryjy tehnologiýalary işläp taýýarlamak we ornaşdyrmak babatda özara hyzmatdaşlyk meselelerine garaldy.
Duşuşygyň ahyrynda taraplar bu ugurdaky meseleleri çözmek üçin hyzmatdaşlyga taýýardyklaryny tassykladylar.
