Aşgabadyň Jemgyýetçilik guramalarynyň merkezinde «Türkmen keşdesi – milli baýlygymyz» bäsleşiginiň jemi jemlendi diýip, "Türkmenistan: Altyn asyr" elektron neşiri habar berýär.
Bäsleşik Türkmenistanyň Zenanlar bileleşiginiň Merkezi geňeşi, Kärdeşler arkalaşyklarynyň Milli merkezi, Türkmenistanyň ÝUNESKO-nyň işleri baradaky Milli toparynyň sekretariaty we Türkmenistanyň Telewideniýe, radiogepleşikler we kinematografiýa baradaky döwlet komiteti tarapyndan guraldy.
Bäsleşik üç esasy tapgyrdan ybarat bolup, birinji tapgyrda oňa gatnaşyjylar milli keşdeçilik sungatynyň ösmegine goşantlaryny paýlaşdylar. Soňra keşde gaýamak ussatlygyny görkezdiler. Jemleýji tapgyrda gadymy sungaty şygyrlarda we gyzykly rowaýatlarda wasp edip, taýýar işleri bilen çeper döredijilikli tanyşdyrdylar.
Diňe çeper elli zenanlarynyň bäsleşigine tomaşa etmek bilen çäklenmän, eýsem, göwne ýaran keşdeçini saýlamaga işjeň gatnaşyp bolýardy, çünki bäsleşigiň ýeňijileri SMS bilen ses bermek arkaly kesgitlenildi.
Bäsleşikde SMS sesleriniň aglabasyny alan Mary welaýatynyň keşdeçileri ýeňiş gazandylar. Daşoguz welaýatynyň wekilleri ikinji orny eýelediler, Lebap welaýatynyň çeper elli zenanlary üçünji orny eýelediler.
Ýeňijilere gymmatly sowgatlar we Hormat hatlary gowşuryldy.
