16—17-nji iýun aralygynda Tähran şäherinde beýik türkmen şahyry we akyldary Magtymguly Pyragynyň ömrüne hem-de döredijiligine bagyşlanan birnäçe çäreler geçirildi. Bu barada Türkmenistanyň Daşary işler ministrliginiň metbugat gullugy habar berýär.
Çäreleriň iň esasysy «Ykdysady Hyzmatdaşlyk Guramasynyň sebitinde agzybirligiň we medeni galkynyşyň sesi» atly maslahat boldy.
Bu forum Ykdysady Hyzmatdaşlyk Guramasynyň Medeniýet institutynda ilçileriň, diplomatlaryň, şahyryň döredijiligini öwreniji alymlaryň, medeniýet işgärleriniň we jemgyýetçilik wekilleriniň gatnaşmagynda guraldy.
Maslahatda Medeniýet institutynyň prezidenti, Türkmenistanyň ilçisi, Täjigistanyň Milli uniwersitetiniň taryh professory, Eýrandaky «Türkmen medeniýet öýi» sungat institutynyň direktory we edebiýatşynaslar çykyş etdi.
Gatnaşyjylar Magtymguly Pyragynyň edebi mirasynyň ähmiýetini, onuň milli we dünýä edebiýatyndaky ornuny, pelsepewi garaýyşlaryny, şeýle hem eserlerinde beýan edilýän watançylyk, agzybirlik, adalatlylyk we ynsanperwerlik ýörelgelerini ara alyp maslahatlaşdy. Çäräniň dowamynda şahyr baradaky wideoýazgylar hem görkezildi.
Mundan başga-da, 16-njy iýunda Harezmi uniwersitetinde aýratyn medeni çäre geçirildi. Oňa gatnaşyjylar Magtymguly Pyragynyň döredijiligi barada çykyş etdi, şahyryň goşgularyny okady, onuň goşgularyna döredilen aýdymlary ýerine ýetirdi hem-de türkmen medeniýetine, sungatyna we edebiýatyna bagyşlanan sahna çykyşlaryny görkezdi.
