Mariý El Respublikasynyň paýtagty Ýoşkar-Ola şäherinde birinji Mariý halkara etnik kinofestiwaly geçirilýär. Bu festiwal Russiýanyň, GDA ýurtlarynyň, Aziýanyň we Ýewropanyň kino pudagynyň wekillerini bir ýere jemleýär.
Festiwalyň maksatnamasyna 30-a golaý film girizildi. Doly metražly filmleriň bäsleşiginde alty sany ekran eseri görkeziler, olaryň arasynda Özbegistan bilen Türkmenistanyň bilelikde öndüren «Magtymguly Pyragy» filmi hem bar (režissýory Muzaffarhan Erkinow).
Filmlere Gyrgyzystandan, Täjigistandan, Eýrandan, Wengriýadan we Russiýadan bolan hünärmenlerden ybarat halkara eminler topary baha berýär.
Festiwalyň çäklerinde gysga metražly filmleriň bäsleşigi, çagalar üçin görkezilişler, ussatlyk sapaklary, hünär duşuşyklary we ýörite kino görkezilişleri meýilleşdirildi.
Bu medeni çäre Russiýanyň Halklarynyň agzybirligi ýylyna (2026) bagyşlanyp, onuň esasy maksady kino sungaty arkaly milletara ylalaşygy berkitmekden, etnik dürlüligi gorap saklamakdan we medeni mirasy giňden wagyz etmekden ybaratdyr.
Ýeňijileri sylaglamak dabarasy 19-njy iýunda Ýakow Eşpaý adyndaky Mariý döwlet filarmoniýasynda geçiriler.
