«Animakkord» studiýasy «Maşa we üç aýy» atly täze multserialy tanyşdyrdy. Ol «Maşa we Aýy» taslamasynyň spin-offy bolar diýip, «The Hollywood Reporter» habar berýär.
Sýužetiň merkezinde Maşa we üç sany täze gahryman — Uly Aýy, Orta Aýy we Kiçi Aýy bolar. Awtorlar maşgala, ene-atalyk we çaga baradaky alada ýaly temalara ünsi çekmegi meýilleşdirýär.
Studiýanyň täjirçilik müdiri Magdalena Weremýugyň aýtmagyan görä, döredijiler Tylla saçly we üç aýy baradaky ertekiden, şeýle hem çagalary bilelikde terbiýelemek baradaky hekaýalardan ylham aldy. Birinji möwsüm çagany ýatyrmakdan başlap, durmuşy başdangeçirmelere çenli tanyş bolan gündelik ýagdaýlara bagyşlanar.
Taslama 21—27-nji iýun aralygynda geçiriljek Ansidäki Halkara animasiýa festiwalynda tanyşdyrylar. Ilkinji treýleriň güýzde görkezilmegine, serialyň premýerasyna bolsa 2027-nji ýylyň ikinji ýarymynda bolmagyna garaşylýar.
Ilkinji «Maşa we Aýy» multserialy 2009-njy ýyldan bäri çykyp gelýär we häzirki wagta çenli onuň dokuz möwsümi bar. Taslama 47 dile terjime edildi we YouTube platformasynda iň köp tomaşa edilen multfilm hökmünde Ginnesiň rekordlar kitabyna girdi.
Mundan ozal, Netflix kompaniýasynyň «Maşa we Aýynyň» iki sany täze möwsümi üçin hukuk satyn alandygy we öňki bölümleri 100-den gowrak ýurtda görkezmek üçin ygtyýarnamanyň möhletini uzaldandygy belli boldy.
