Balkan welaýatynyň Gyzylarbat etrabynda kuwwaty 10 megawat bolan köpugurly Gün we ýel elektrik stansiýasy, Ahal welaýatynyň Bäherden etrabynda “Bäherden” keramiki önümler kärhanasy açylar. Bu barada 18-nji oktýabrda geçirilen Hökümet mejlisinde wise-premýer B.Annamämmedow habar berdi.
Wise-premýer täze desgalaryň açylyş dabaralaryna taýýarlyk görülýändigi barada hasabat berdi.
Wise-premýer şeýle hem Gurluşyk we senagat toplumynyň işgärleriniň güni mynasybetli geçiriljek möhüm çäreler, hususan-da, “Türkmenistanyň gurluşygy, senagaty, energetikasy — 2024” atly halkara sergä hem-de “Türkmenistanyň gurluşyk, senagat, energetika pudaklarynyň ösüşi” atly maslahata görülýän taýýarlyk barada hasabat berdi.
Bellenilişi ýaly, geçiriljek halkara sergi we maslahat ýurdumyzyň gurluşyk ulgamynda, senagat önümçiliginde, energetika, himiýa pudagynda, ýol gurluşygynda gazananlary bilen tanyşmaga ýardam berer. Bu möhüm çäreleriň çäklerinde gurluşyk-senagat toplumynyň ministrlikleriniň we pudaklaýyn dolandyryş edaralarynyň ýolbaşçylary bilen daşary ýurt kompaniýalarynyň wekilleriniň duşuşyklary meýilleşdirilýär. Munuň özi täze işewürlik gatnaşyklaryny ýola goýmaga, özara tejribe alyşmaga ýardam berer.
Türkmenistanyň Prezidenti bu möhüm çärelere gowy taýýarlyk görmegi we olary ýokary derejede geçirmegi wise-premýere tabşyrdy.
