Apple brendi eýýäm on iki ýyl bäri dünýäde iň gymmat brend bolmagynda galýar. Bu barada her ýyl Interbrand Corp. tarapyndan düzülýän Best Global Brands reýtinginiň maglumatlaryna salgylanyp, Interfax.ru habar berýär.
Apple brendiniň bahasy bir ýylda 3% peselip, 488,9 mlrd dollar boldy.
Ikinji orunda 11% (352,5 mlrd dollara çenli) gymmatlan Microsoft brendi ýerleşýär. Üçünji orny bolsa 8% (298,1 mlrd dollara çenli) gymmatlan Amazon eýelemegini dowam edýär. Dördünji orunda bahasy 12% (291,3 mlrd dollara çenli) gymmatlan Google, bäşinji orunda Samsung (10% ösüş, 100,8 mlrd dollara çenli) bar.
Bu brendleriň yzyny Toyota (13% ösüş, 72,8 mlrd dollara çenli), Coca-Cola (5% ösüş, 61,2 mlrd dollara çenli), Mercedes-Benz (4% peselme, 58,9 mlrd dollara çenli), McDonald’s (4% ösüş, 53 mlrd dollara çenli) we BMW (2% ösüş, 52 mlrd dollara çenli) dowam etdirýär.
Soňky bir ýylda bahada iň uly ösüşi Ferrari (+21%, 13,1 mlrd dollara çenli) we YouTube (+16%, 30,1 mlrd dollara çenli) brendleri görkezdi, olar reýtingde 62-nji we 24-nji orunlary eýelediler. Şol bir wagtyň özünde, Tesla (9%), Intel (30%), Disney (11%) brendleriniň bahasy has güýçli pese gaçdy.
Reýtinge şu ýyl dört sany gatnaşyjy goşuldy – Nvidia, Pandora, Range Rover we Jordan. Şeýle-de, Uber we LG brendleri ýene sanawa girdi. Nokia, Kodak we MTV ýaly brendler bolsa sanawy terk etdi.
TOP-100 brendiň umumylykda bahasy 3,4 trln dollar diýlip hasaplanylýar. 2001-nji ýylda reýting ilkinji gezek hödürlenende, TOP-100-däki brendleriň umumy bahasy 988 mlrd dollardy. Ýagny, häzire çenli görkeziji 3,4 esse ýokarlandy.
