Google kompaniýasy ozal «Android» goşundylaryny goldaýan we «Gemini» emeli aň funksiýalary bilen enjamlaşdyrylan premium segmentli enjamlar hökmünde tanyşdyrylan «Googlebook» noutbuklarynyň has elýeterli wersiýalaryny çykarmak meýilnamasyny tassyklady. Bu barada ChromeOS-iň ýolbaşçysy Jon Maletis habar berdi.
Onuň sözlerine görä, kompaniýa täze tehnologiýalary enjamlaryň nyrh kategoriýasyna garamazdan, ulanyjylar üçin elýeterli etmegi maksat edinýär.
«Biz elmydama tehnologiýalaryň nyrh segmentine garamazdan, öndürijiligi we maglumatlara elýeterliligi üpjün etmegini isleýäris, şonuň üçin wagtyň geçmegi bilen bahalary aşakladarys, ýöne ilkinji enjamlar super-premium kategoriýasyna degişlidir» diýip, Maletis belledi.
Häzirki wagtda «Googlebook» we «Chromebook» dürli ulanyjy toparlaryna niýetlenendir. «Chromebook» arzan bahadan, ulanmak üçin ýönekeýligi we bilim ulgamynda meşhurlygy bilen ýaýrady. «Googlebook» bolsa, tersine, «Windows» we «macOS» esasyndaky premium enjamlar bilen bäsleşip biljek flagman noutbuklar hökmünde görkezilýär.
Şol bir wagtyň özünde, «Googlebook» «Android» goşundylaryny we «Gemini» funksiýalaryny goldar hem-de has döwrebap interfeýsi alar. Arzan modelleriniň peýda bolmagy bilen, «Googlebook» we «Chromebook-yň» arasyndaky tapawutlar has az görnüp biler.
Google şeýle hem Chromebook-yň önümçiliginiň geljek ýyl dowam etjekdigini we hereket edýän enjamlaryň uzak wagtlap programma üpjünçiliginiň täzelenmelerini aljakdygyny habar berdi. Korporasiýa 2034-nji ýyla çenli «ChromeOS-den» kem-kemden ýüz öwürmegi meýilleşdirýär. «ChromeOS» we «Android» esasynda «Aluminium OS» atly täze birleşdirilen ulgamyň 2028-nji ýylda çykmagyna garaşylýar.
«Android Authority-niň» bellemegine görä, Maletisiň beýanaty «Googlebook-yň» noutbuk bazarynda Google-yň uzak möhletli strategiýasyna öwrülip biljekdigini we wagtyň geçmegi bilen Chromebook-uň ornuny tutup biljekdigini görkezýär.
