Google käbir işgärlerine «öz islegi bilen» işden gitmegi teklip etdi

Google özüniň «Global Business Organization» (GBO) bölüminiň işgärleriniň belli bir bölegini meýletin işden gidermek maksatnamasyna başlaýar. Bu barada kompaniýanyň täjirçilik direktory Filipp Şindleriň gulluk hatyny öwrenen Business Insider neşiri mälim etdi.
Aýry-aýry toparlaryň işgärleri öz islegi boýunça kompaniýadan çykyp bilerler we muňa derek olara kompensasiýa tölener.
Şindler öz hatynda kompaniýanyň garaýşy we täze şertleri hakynda nygtap: «Siziň 2025-nji ýyldaky gazanan üstünlikleriňiz netijesinde biz täze ýyla güýçli maksat bilen başlaýarys» diýip belleýär we şol bir wagtyň özünde, häzirki wagtda ýagdaýyň örän güýçli we tiz depginlidigini, töwekgelçilikleriň hem şonça ýokarydygyny ýaňzydýar.
Onuň aýtmagyna görä, GBO bölüminiň işgärleri kompaniýanyň wezipelerine doly goşulmaly we iş netijeliligini ýokarlandyrmak üçin emeli aň gurallaryny ulanmaly. Häzirki depgine uýgunlaşyp bilmeýän we işini «Google-dan daşarda dowam etmäge taýýar» kadrlara bolsa, täze maksatnamadan peýdalanmak teklip edilýär.
Meýletin işden gitmek şertleri çözgütler we satuwlar, korporatiw ösüş we ýene birnäçe beýleki ugurlar boýunça toparlara degişlidir. Oňa derek müşderiler bilen göni işleşýän wezipeler we ABŞ-daky iri müşderi hyzmaty toparlary bu maksatnama gatnaşyp bilmezler. «GBO-nyň ähli wezipeleri biziň uzak möhletleýin strategiýamyz üçin möhüm bolsa-da, müşderilerimiz üçin kynçylyklaryň ýüze çykma ähtimallygyny iň pes derejä düşürmek maksady bilen, bu orunlar üçin maksatnamany hödürlemezlik kararyna geldik» diýip, hatda bu hakynda agzalýar.
Google ozal şeýle görnüşli maksatnamalary beýleki bölümleriniň işgärlerine-de hödürläpdi. Kompaniýa Business Insider-iň bu baradaky soraglaryny häzirlikçe jogapsyz galdyrdy.