Lego kompaniýasy birinji nesil BMW M3 E30 kupesine bagyşlanan «Speed Champions» seriýasyndan täze toplumy taýýarlaýar. Konstruktoryň satuwy 1-nji awgustda başlanar.
Kompaniýanyň bu täze toplumy işläp düzýändigi barada Lego-nyň işgärler toparynyň Germaniýadaky BMW-niň ştab-kwartirasyna eden saparyndan soň mälim edildi. Ol ýerde awtoulag konserniniň dizaýnerleri we inženerleri bilen geňeşmeler geçirilipdi.
Häzirki wagtda Lego diňe prototipleriň suratlaryny çap etdi. Konstruktoryň bahasy ABŞ-da 30 dollar, Ýewropada bolsa 28 ýewro bolar.
Kompaniýa şeýle hem modeliň reňkiniň şekillerini görkezdi. Dizaýny wintaž stilinde ýerine ýetirilip, ol bar bolan sport ulagynyň bezegine bölekleýin esaslanýar. Lego-nyň düşündirişine görä, burçlak çyzgy firmanyň kubikleriniň formasyna meňzedilipdir, kapotdaky “40-lyk” san bolsa «M3» modeliniň ýubileýini aňladýar.
Toplumyň detallarynyň takyk sany entek mälim edilmedi. Şol bir wagtyň özünde, dizaýnerler klassiki sport ulagynyň daşky görnüşiniň esasy elementlerini gaýtalamaga çalyşandyklaryny aýtdylar.
Takmynan iki ýyl ozal Lego eýýäm «Speed Champions» seriýasy üçin BMW-niň iki sany ýaryş awtoulagyny — M Hybrid V8 we M4 GT3 halka görnüşli kupesini öz içine alýan toplumy çykarypdy. Şonda toplum 676 detaldan ybaratdy.
