Aşgabatda Arçabil şaýolundan başlap, Halkara kardiologiýa merkezine barýan 1970-nji köçäniň adyna germaniýaly belli kardiohirurg, lukmançylyk ylymlarynyň doktory, professor Hans Maýsneriň ady dakyldy. Mundan beýläk bu köçe "professor Hans Maýsner şaýoly" (professor Hans Meisner strasse) diýlip atlandyrylar. Türkmenistanyň Mejlisi degişli Karar çykardy.
10-njy oktýabrda Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda Aşgabatda «Kalbyň şypasy» atly binanyň hem-de durky täzelenen bu şaýoluň açylyş dabarasy boldy. Gurbanguly Berdimuhamedow professor Hans Maýsneriň saglygy goraýyş ulgamynda türkmen-german gatnaşyklaryny ösdürmäge goşan goşandynyň uludygyny aýratyn belläp, hemmeleri bu şanly waka bilen ýene bir gezek tüýs ýürekden gutlady.
"Şu günki şanly dabara meniň üçin ýatdan çykmajak pursatlara beslendi. Häzirki zaman hassahanalary bina edilen bu ajaýyp köçä meniň adymyň dakylmagy durmuşymda aýratyn tolgundyryjy, unudylmajak wakadyr. Türkmenistana her gezek gelenimde, ýurduň näderejede özgerýändigine, şol sanda milli saglygy goraýyş ulgamynyň ösdürilýändigine göz ýetirýärin. Muňa meniň hem şahsy goşandymyň bardygyna buýsanýaryn" diýip, Germaniýa Federatiw Respublikasynyň Mýunhen şäherindäki Kardiologiýa merkeziniň direktory Hans Maýsner belledi.
