Türkmen halkynyň Milli Lideri Gurbanguly Berdimuhamedow Türkmenistanyň Halk Maslahatynyň adyndan Prezident Serdar Berdimuhamedowy doglan güni bilen gutlady.
"Siziň berkarar Watanymyzy mundan beýläk-de gülledip ösdürmäge, ykdysady kuwwatyny artdyrmaga, mähriban halkymyzyň durmuş hal-ýagdaýyny has-da ýokarlandyrmaga gönükdirilen döwrebap özgertmeleriňiziň, parahatçylyk söýüjilik, dostluk ýörelgelerine esaslanýan içeri we daşary syýasatyňyzyň, döretmek, gurmak başlangyçlaryňyzyň elmydama üstünliklere beslenmegini arzuw edýärin.
Siziň baştutanlygyňyzda ata Watanymyzyň beýik ösüşleriniň täze tapgyry başlandy. Döwrümiziň iri taslamasy bolan döwlet ähmiýetli Arkadag şäheri berkarar döwletimiziň täze taryhy eýýamdaky ösüşleriniň, özgertmeleriniň aýdyň nyşanyna öwrüldi.
Siziň baştutanlygyňyzda Gündogaryň beýik akyldary Magtymguly Pyragynyň doglan gününiň 300 ýyllyk şanly senesi mynasybetli Köpetdagyň eteginde söz ussadynyň belent başly ýadygärliginiň hem-de «Magtymguly Pyragy» medeni-seýilgäh toplumynyň dabaraly ýagdaýda açylmagy, bu ýerde dünýä medeniýetiniň görnükli wekilleriniň 24-siniň heýkelleriniň oturdylyp, ýadygärliginiň ebedileşdirilmegi paýtagtymyzyň dost-doganlygyň we parahatçylygyň merkezi hökmündäki ähmiýetini has-da artdyrýar.
Siziň tagallalaryňyz hem-de ak pataňyz bilen, doganlyk Owganystanyň halkynyň abadan, bagtyýar ýaşaýşy üçin demir ýol, elektrik energiýasy, gaz üpjünçiligi bilen bagly iri desgalaryň açylmagy we gurluşygyna girişilmegi täze taryhy döwrümizde alyp barýan ynsanperwer daşary syýasatyňyzyň üstünliklere beslenýändiginiň aýdyň güwäsidir. «Pähim-paýhas ummany Magtymguly Pyragy» ýylynda Türkmenistanyň maýa goýum forumynyň, ýurdumyzyň ykdysadyýetine ýokary tehnologiýalary we innowasiýalary çekmek boýunça halkara maslahatyň hem-de ugurdaş sergileriň geçirilmegi milli ykdysadyýetimize iri möçberli maýa goýumlary çekmekde, özara bähbitli halkara hyzmatdaşlygyň gerimini giňeltmekde möhüm ähmiýete eýe boldy" diýip Gurbanguly Berdimuhamedow Gutlagynda belleýär.
Türkmen halkynyň Milli Lideri şeýle hem Türkmenistanyň Prezidentiniň «Ýaşlar — Watanyň daýanjy», «Änew — müňýyllyklardan gözbaş alýan medeniýet» atly kitaplarynyň "eziz Watanymyzy ösdürmekde türkmen halkyna goldaw berjekdigine, diňe bir ýurdumyzyň ylmy-edebi hazynasynda däl-de, eýsem, dünýä jemgyýetçiliginiň ylmy hazynasynda hem mynasyp orun aljakdygyna pugta ynanýandygyny" belleýär.
