3-nji sentýabrda Türkmenistanyň daşary işler ministri Raşid Meredow Türki medeniýetiň halkara guramasynyň (TÜRKSOÝ) Baş sekretary Sultan Raýewiň ýolbaşçylygyndaky wekiliýetiň agzalary bilen Türkmenistan bilen TÜRKSOÝ-yň arasyndaky hyzmatdaşlygyň möhüm meselelerini maslahatlaşdy diýip, ýurdumyzyň daşary syýasat edarasy habar berýär.
Bellenilişi ýaly, 2024-nji ýyl türki dilli dünýäde Türkmenistan üçin ähmiýetli ýyl bolup durýar, çünki üstümizdäki ýyl TÜRKSOÝ tarapyndan «Türki dünýäsiniň beýik şahyry we akyldary Magtymguly Pyragy ýyly», şeýle hem Änew şäheri Türki dünýäsiniň medeni paýtagty diýlip yglan edildi.
Duşuşyga gatnaşyjylar beýik akyldar şahyr Magtymguly Pyragynyň döredijiliginiň hem-de gadymy Änew şäheriniň medeni ähmiýetini wagyz etmek maksady bilen ýakyn wagtda geçiriljek bilelikdäki çäreleriň guralyşy bilen bagly meselelere aýratyn üns berdiler.
Duşuşygyň ahyrynda söhbetdeşler Türkmenistan bilen TÜRKSOÝ-yň arasyndaky türki dilli halklaryň örän baý medeni mirasyny gorap saklamaga, öwrenmäge we wagyz etmäge gönükdirilen özara gatnaşyklaryň netijeli häsiýetini nygtadylar.
