28-nji awgustda Eýrana iş saparynyň çäklerinde Türkmenistanyň Halk Maslahatynyň Başlygy Gurbanguly Berdimuhamedow Prezident Masud Pezeşkian bilen giňişleýin düzümde gepleşikleri geçirdi. Gün tertibine ikitaraplaýyn görnüşde, iri halkara guramalaryň çäklerinde döwletara hyzmatdaşlygyň giň meseleleri girizildi diýip, TDH habar berýär.
Duşuşygyň barşynda Gurbanguly Berdimuhamedow ikitaraplaýyn bähbitli birnäçe teklipler bilen çykyş etdi. Hususan-da,
- özara söwdanyň möçberini ýokarlandyrmak üçin ikitaraplaýyn esasda iberilýän önümleri we harytlary artdyrmak teklip edildi. Hususy kompaniýalar bu işlere işjeň gatnaşmaga çagyryldy;
- türkmen tarapy Eýrana iberilýän gazyň möçberini her ýylda 40 milliard kub metre çenli artdyrmagy göz öňünde tutýar. Munuň üçin Türkmenistanyň çäginde iki sany täze gaz gysyjy desgany we 125 kilometrlik täze gaz geçirijini gurmak meýilleşdirilýär. Munuň özi Eýrana iberilýän türkmen tebigy gazynyň goşmaça möçberini «Çaloýuk» gaz ölçeýji desgasyna çenli akdyrmaga mümkinçilik berer;
- Elektroenergetika pudagynda möhüm taslama bolan Mary — Maşat elektrik geçirijisiniň türkmen böleginiň gurluşygynyň ähmiýeti bellenildi. Güýjenmesi 500/400 kilowolta barabar bolan bu elektrik geçiriji Mary şäherinden başlap, Sarahsa we ol ýerden türkmen-eýran serhedine çenli uzalar. Onuň türkmen-eýran serhedine çenli uzynlygy 155 kilometre deň bolar;
- “Sarahs” we “Inçeburun” demir ýol geçiriş nokatlaryndan geçýän harytlaryň möçberini köpeltmek teklip edildi. Türkmenistan bu ugurda eýran tarapy bilen bilelikde işlemäge taýýar. Gazagystan — Türkmenistan — Eýran demir ýolunyň ugry boýunça boýunça geçýän awtomobil ýoly arkaly ýük gatnawlarynyň möçberini artdyrmak maksady bilen, üçtaraplaýyn esasda işlemek teklip edildi. Bu hereketleri amala aşyrmak üçin ýurtlarymyzyň kompaniýalaryny işe çekmek ýerlikli bolar diýip, Gurbanguly Berdimuhamedow aýtdy;
Duşuşygyň barşynda Eýranyň Prezidenti Ermenistan — Eýran — Türkmenistan — Gazagystan üstaşyr ulag geçelgesi boýunça ýük daşamak we bu ugry netijeli peýdalanmak babatda tekliplerini beýan etdi.
Giňişleýin düzümdäki gepleşikler tamamlanandan soňra, ikitaraplaýyn resminamalara gol çekmek dabarasy boldy.
