29-njy iýulda Türkmenistanyň daşary işler ministri Raşid Meredow Gyrgyz Respublikasynyň hem-de Gazagystanyň daşary işler ministrleri bilen telefon arkaly söhbetdeşlik geçirdi.
Türkmenistanyň DIM-niň habar bermegine görä, telefon arkaly söhbetdeşlikleriň barşynda taraplar syýasy-diplomatik, söwda-ykdysady, medeni-ynsanperwer ugurlardaky ikitaraplaýyn gatnaşyklaryň ileri tutulýan meselelerini ara alyp maslahatlaşdylar.
Gyrgyz Respublikasynyň Daşary işler ministri Žeenbek Kulubaýew bilen söhbetdeşlikde iň ýokary döwlet derejesinde özara saparlar bilen baglanyşykly meseleler ara alnyp maslahatlaşyldy. Şeýle hem dürli derejelerdäki syýasy geňeşmeleriň ähmiýeti nygtaldy. Şol bir wagtyň özünde, taraplar iki ýurtda geçirilýän çärelere ýokary derejeli wekiliýetleriň gatnaşmagynyň ähmiýeti barada pikir alyşdylar.
Gazagystan Respublikasynyň Premýer-ministriniň Orunbasary, Daşary işler ministri Murat Nurtleuwy bilen söhbetdeşlikde ministrler ikitaraplaýyn hyzmatdaşlygyň möhüm ugurlaryna garadylar. Türkmenistan bilen Gazagystanyň arasyndaky gatnaşyklaryň ösmeginde esasy şertleriň biri ýokary derejede dostlukly dialogyň bolup durýandygy bellenildi.
