Şu gün, 27-nji iýunda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow “Kawasaki Heavy Industries Ltd.” kompaniýasynyň strategiki meseleler boýunça uly geňeşçisi Tatsuýa Watanabe we bu kompaniýanyň ýerine ýetiriji direktory Kendzi Sanada bilen duşuşdy.
Duşuşygyň barşynda bellenilişi ýaly, “Kawasaki Heavy Industries Ltd.” kompaniýasy bilen köp ýyllaryň dowamynda netijeli hyzmatdaşlyk ýola goýuldy, birnäçe iri taslamalar durmuşa geçirildi. Olaryň arasynda Owadandepedäki tebigy gazdan benzin öndürýän zawody, Mary welaýatyndaky karbamid zawodyny we Keletedäki sement zawodyny muňa mysal hökmünde görkezmek bolar.
Gurlan desgalary doly güýjünde işletmek bilen bir hatarda, Türkmenistanyň tebigy gazy çykarmak we gaýtadan işlemek boýunça meýilnamalaryny göz öňünde tutup, ikitaraplaýyn hyzmatdaşlygy ösdürmek üçin täze mümkinçilikler döreýär.
Bellenilişi ýaly, ýurdumyzda taslamalar amala aşyrylanda, öňdebaryjy tejribäniň, ýokary tehnologiýalaryň ulanylmagy, ýokary hil ölçeglerine, şeýle hem ekologiýa talaplaryna laýyk gelmegi möhüm şert bolup durýar.
Ikitaraplaýyn hyzmatdaşlygy mundan beýläk-de ösdürmek üçin Siziň bu ugurdaky anyk teklipleriňize seretmäge taýýardyrys diýip, Gurbanguly Berdimuhamedow aýtdy we “Kawasaki Heavy Industries Ltd.” kompaniýasy bilen netijeli hyzmatdaşlygyň mundan beýläk-de ösdüriljekdigine ynam bildirdi.
Öz nobatynda, işewürler wekilçilik edýän kompaniýasynyň ýurdumyz bilen uzakmöhletleýin we özara bähbitlilik esasda hyzmatdaşlyk edýändigini nygtap, Ýaponiýanyň işewür toparlarynyň geljegi uly türkmen bazaryna uly gyzyklanma bildirýändigini hem-de türkmen hyzmatdaşlaryna öz tejribesini we iň täze tehnologik işläp taýýarlamalary hödürlemäge taýýardygyny bellediler.
