Türkmenistanda ýaşaýan Eýranyň raýatlary 28-nji iýunda geçiriljek nobatdan daşary prezident saýlawlarynda ses berip bilerler. Bu barada Eýran Yslam Respublikasynyň Türkmenistandaky diplomatik wekilhanasynda aýdylýar.
Saýlaw uçastoklary Eýranyň Aşgabatdaky ilçihanasynyň we Mary şäherindäki Baş konsullygynyň binasynda açylar. Saýlaw uçastoklarynyň anyk iş wagty biraz soňra mälim ediler.
Ses bermek üçin Eýranyň raýatlaryna ýany bilen Eýranyň hereket edýän raýatlyk pasportyny alyp gelmek zerur.
Eýranyň 8-nji prezidenti Ebrahim Raisiniň awiaheläkçiliginde ýogalandan soň, ýurtda möhletinden öň prezident saýlawlary yglan edildi. Şu gezekki saýlawlara alty dalaşgär tassyklanyldy.
