15-nji iýunda Balkan welaýatyna iş saparynyň çäklerinde Prezident Serdar Berdimuhamedow Gyzylarbat etrabynyň “Arkaç” daýhan birleşiginiň kärendeçileri ekiz doganlar Annaguly we Aşyrguly Annagulyýewler bilen söhbetdeş bolup, olaryň iş şertleri, kärende ýerinde ösdürip ýetişdirýän ekinleriniň görnüşleri hem-de galla meýdanlarynyň hasyllylygy bilen gyzyklandy.
Kärendeçi doganlar Annagulyýewler ýaşlar üçin döredilip berýän mümkinçilikleriniň netijesinde ýaşlaryň tutanýerli we öndürijilikli zähmet çekmekleri üçin ähli şertleriň bardygyny aýtdylar. Şeýle hem olar 2020-nji ýyldan bäri daýhançylyk bilen meşgullanýandyklaryny aýtdylar. Annaguly şu ýyl 64 gektar meýdandan 256 tonna bugdaý hasylyna garaşýandygyny, bugdaýdan başga-da, 15 gektar gowaça, 5,7 gektar ýeralma we 4 gektar gök-bakja ekinlerini ekendigini, Aşyrguly hem 15 gektar gowaça, 4,3 gektar ýeralma we 4 gektar gök-bakja ekin ekendigini aýtdy.
Serdar Berdimuhamedow şu ýyl bugdaýyň we pagtanyň döwlet satyn alyş nyrhlarynyň ýokarlandyrylandygyny we indi daýhanlaryň girdejileriniň has hem köp boljakdygyny aýdyp, ýurdumyzda oba hojalygyny ösdürmäge uly üns berilýändigini, obada durmuş ýaşaýyş şertlerini gowulandyrmak üçin ähli zerur işleriň geçirilýändigini belledi.
Şeýle hem döwlet Baştutany halal zähmet çekip, ýerden bol hasyl alýan daýhanlara döwletimiziň hemişe goldaw berjekdigini aýtdy.
Serdar Berdimuhamedow ýerden bol hasyl öndürýän kärendeçilere özüniň sowgatlaryny gowşurdy.
Soňra bu ýerde döwlet Baştutany Balkan welaýatynyň häkimine welaýatyň ýaşaýjylary üçin döwrebap awtoulaglaryň açarlaryny gowşurdy.
