Aşgabatda Türkmenistanda Ylymlar gününe bagyşlanan ylmy taslamalaryň sergisinde S.Nyýazow adyndaky Türkmen Oba hojalyk uniwersitetiniň talyby Kerim Meredow ýyladyşhanalardaky işi awtomatlaşdyrmak üçin döredilen roboty hödürledi. Bu barada CentralAsia.news ýazdy.
Meredow tarapyndan işlenip düzülen robot pomidor ýygnamak üçin miwä ýetiriljek zyýany azaldýan wakuum sorujyny ulanýar. Şeýle hem robot pomidorlary tanamak üçin takyk we netijeli hasyl ýygnamagy üpjün edýän wizual maglumatlara esaslanýan emeli aň bilen enjamlaşdyrylandyr.
Robotyň ösümlikleri suwarmak, zyýankeşlere garşy himiki serişdeleri sepmek we gije-gündiziň dowamynda işlemek funksiýalary bardyr, bularyň esasynda ýyladyşhanalaryň öndürijiligi ýokarlanar we zähmet çykdajylary azalar.
"Şeýle hem robot öz-özüni anyklaýyş we ownuk näsazlyklary özbaşdak kesgitlemäge we çözmäge mümkinçilik berýän awtomatiki düzediş ulgamy bilen enjamlaşdyrylandyr"-diýip, Meredow belläp geçdi.
Talyp taslamanyň pikiriniň oba hojalyk ulaglary kafedrasynyň uly mugallymy Esenmyrat Şagulyýew tarapyndan berlendigini aýtdy.
Talyp: "Bu pikiri hakykata öwürmek üçin bir ýarym ýyl gerek boldy" -diýdi.
Kerim Meredow we kursdaşy Ýaran Hudaýberdiew Moskwada geçirilen “Suw bäsleşigi 2024”-üň Gran Prisiniň ýeňijileridir. Talyplar “Howanyň üýtgeýän şertlerinde Amyderýanyň basseýniniň dinamikasynyň geosfera seljermesi we çaklaýyş modelleri” taslamasy bilen bellendiler.
