BMW Group awtomobil konserni wirtual kraş-testleriň we heläkçilikleriň kompýuter modelirlemesiniň prosesine emeli aň tehnologiýalaryny ornaşdyrmak üçin Fransiýanyň Mistral AI kompaniýasy bilen strategik hyzmatdaşlygy başlaýandygyny yglan etdi.
Bu hyzmatdaşlygyň çäklerinde emeli aň modelleri BMW kompaniýasynyň onýyllyklaryň dowamynda toplanan hakyky hem-de wirtual heläkçilikler baradaky maglumatlarynyň esasynda okadylar. Kompaniýa bu çemeleşmäniň geçirilen synaglaryň netijelerini seljermegiň netijeliligini ýokandyrjakdygyna we täze awtomobilleriň işlenip taýýarlanylyşyny has-da çaltlaşdyrjakdygyna ynanýar.
Häzirkizaman wirtual kraş-testleri ägirt uly mukdardaky tehniki maglumatlary döredýär we olary gaýtadan işlemek köp wagty talap edýär. BMW-niň berýän maglumatlaryna görä, emeli aň awtomobiliň kuzowynyň gowşak bolan howply zolaklaryny awtomatik usulda anyklap, çaknyşyk pursatynda gurluş elementleriniň özüni nähili alyp barjakdygyny öňünden çaklap biler we berkligi ýokarlandyrmagyň dürli ýollaryny entek sanly taslama tapgyrynda hödürläp biler.
Kompaniýa bu täze tehnologiýa inženerleriň ornuny tutmak üçin däl-de, eýsem olara ýardam berýän kämil gural hökmünde seredilýändigini aýratyn nygtaýar. Emeli aňy ulanmak gysga wagtyň dowamynda has köp wirtual simulýasiýalary geçirmäge we ozal el güýji bilen seljermek kyn ýa-da uly çykdajyly bolan ýol-ulag hadysalarynyň dürli ýagdaýlaryny modelirlemäge mümkinçilik berer.
