Italiýanyň meşhur moda öýi Gucci 2027-nji ýyl möwsüminden başlap, «Formula-1» ýaryşynda çykyş edýän Fransiýanyň «Alpine» toparynyň baş hyzmatdaşy bolar. Şondan soň toparyň resmi ady «Gucci Racing Alpine Formula One Team» diýlip üýtgediler.
Bu şertnama güýje girenden soň, topar häzirki hemaýatkär BWT kompaniýasynyň gök-gülgüne reňklerinden dolulygyna ýüz öwrüp, Gucci brendiniň firma reňklerine geçer.
Şol bir wagtyň özünde, Gucci sport we kaşaň önümçilik pudagynyň sepgidinde synag platformasy hökmünde görkezilýän Gucci Racing taslamasynyň işe girizilýändigini yglan etdi. Taslamanyň gara we altyn öwüşginli reňklerde taýýarlanan täze logotipi hem hödürlendi.
«RacingNews365» neşiriniň berýän maglumatlaryna görä, bu ylalaşyk birnäçe ýyla niýetlenendir. Habarda aýdylyşyna görä, «Alpine» topary ýylda 55 million dollardan 60 million dollara çenli maliýe serişdesini alar.
Mundan ozal hem «Alpine» toparynyň moda pudagy bilen arabaglanyşygy bolupdy. 1986-njy ýylda bu topary Italiýanyň meşhur eşik brendi bolan Benetton satyn aldy. Şol döwürde Mihael Şumaher bu toparda öz karýerasyna başlap, 1994-nji we 1995-nji ýyllarda özüniň ilkinji çempionlyk titullaryny gazanypdy. 1995-nji ýylda Benetton Konstruktorlaryň kubogyny hem eýelemegi başardy.
Häzirki 2026 möwsüminiň bäş tapgyryndan soň, «Alpine» topary Konstruktorlaryň kubogynda 35 utuk bilen bäşinji orny eýeleýär.
