Ispaniýanyň kazyýeti salgyt işi boýunça aýdymçy Şakiranyň peýdasyna çözgüt çykardy we hökümeti aýdymça 60 million ýewro tölemäge borçly etdi diýip, "Rolling Stones" habar berýär.
Bu mukdara öň tölenen salgytlar, jerimeler we göterimler girýär. Kazyýetiň gelen netijesine görä, häkimiýetler 2011-nji ýylda aýdymçynyň Ispaniýada 183 günden köp bolandygyny subut edip bilmändir. Bu möhlet adamyň Ispaniýada salgyt rezidenti diýlip ykrar edilmegi üçin zerur bolan möhlet.
Kazyýet Şakiranyň Ispaniýada diňe 163 gün bolandygyny tassyklady. Şeýle hem, salgyt edaralarynyň aýdymçynyň futbolçy Žerar Pike bilen bolan gatnaşyklaryny ýurduň onuň durmuş bähbitleriniň merkezi diýlip ykrar edilmegi üçin esas hasaplap boljakdygy baradaky getirilen delilleri ret edildi.
Derňewiň dowamynda artist 2011-nji ýylyň ep-esli bölegini dünýä syýahat çykyşlarynda geçirip, 120 konsert berendigini aýtdy.
Kazyýetiň çözgüdinden soň Şakira işiň netijesini sekiz ýyldan gowrak dowam eden "zalym jemgyýetçilik yzarlamasynyndan" soň adalatlylygyň dikeldilmegi diýip atlandyrdy. Ol şeýle hem prosesiň öz saglygyna we maşgalasyna ýaramaz täsir edendigini mälim etdi.
Ispaniýanyň salgyt gullugy çözgüde garşy şikaýat etmegi meýilleşdirýär we apellýasiýa tamamlanýança serişdeleriň yzyna gaýtarylmajakdygyny habar berdi.
2023-nji ýylda aýdymçy şertli möhlete we 7 million ýewro möçberinde jerime tölemäge razy bolup, salgyt bilen baglanyşykly başga bir işi kadalaşdyrypdy. Ýene bir derňew bolsa subutnamalaryň ýetmezçiligi sebäpli 2024-nji ýylda ýapylypdy.
