Türkmenistanyň Döwlet medeniýet merkeziniň Mukamlar köşgünde Azerbaýjan Respublikasynyň Türkmenistandaky medeniýet günleriniň açylyş dabarasy boldy.
Dabarada türkmen-azerbaýjan hyzmatdaşlygynyň dürli ugurlar boýunça yzygiderli ösýändigi, muňa bolsa ýokary derejedäki yzygiderli duşuşyklaryň we gatnaşyklaryň uly goşant goşýandygy aýratyn nygtaldy. Şeýle hem, Türkmenistanyň Halk Maslahatynyň Başlygy Gurbanguly Berdimuhamedowyň geçen ýylyň oktýabr aýynda Türki döwletleriň guramasynyň döwlet Baştutanlarynyň 12-nji sammitine gatnaşmak üçin Azerbaýjana amala aşyran iş saparyna aýratyn üns çekildi.
Dabaranyň resmi böleginden soň, iki ýurduň döredijilik toparlarynyň we sungat ussatlarynyň gatnaşmagynda uly konsert boldy. Tomaşaçylaryň öňünde Fikret Amirow adyndaky Azerbaýjanyň Döwlet milli saz gurallary orkestri, Gara Garaýew adyndaky Döwlet kamera orkestri, Azerbaýjanyň döwlet tans toparynyň deprekçileri, şeýle hem aýdymçylar we tans toparlary özüniň ajaýyp çykyşlaryny görkezdi.
Azerbaýjanyň halk artisti Gülýanak Mamedowanyň we ýurdumyzyň «Näzli» tans toparynyň gyzlarynyň bilelikdäki çykyşy tomaşaçylar tarapyndan uly şowhun we ruhubelentlik bilen garşylandy.
Medeniýet günleriniň çäginde Türkmenistanyň Şekillendiriş sungaty muzeýinde «Azerbaýjanyň milli mirasynyň merjeni» atly ýörite sergi açyldy. Bu ýerde Azerbaýjanyň Milli haly muzeýiniň gymmatly hazynasyndan haly önümleri, şaý-sepler, keşdeçilik sungatynyň nusgalary, tahýalar başgaplar we milli nagyşlaryň görnüşleri köpçülige hödürlendi.
Mundan başga-da, paýtagtymyzyň «Aşgabat» kinoteatrynda azerbaýjanly režissýorlaryň surata düşüren çeper filmleriniň görkezilişi guraldy.
