«Toyota» kompaniýasy ilkinji gezek ýapon bazary üçin esasy modelleriniň önümçiligini ýurduň çäginden daşarda guramakçy: «Noah» we «Voxy» kysymly awtoulaglaryň önümçiligi Taýwanda başlanar, olary Ýaponiýa import etmek bolsa oktýabr aýynda göz öňünde tutulýar.
Önümçilik zynjyry «Toyota-nyň» Taýwanyň demirgazygyndaky bilelikdäki kärhanasynda dörediler. Kompaniýa bar bolan kuwwatlylygyny döwrebaplaşdyrmagy we ýylda takmynan 100 müň awtoulag, esasan hem arzan modelleri çykarmagy meýilleşdirýär.
Noah we Voxy Toyota-nyň Ýaponiýadaky esasy modelleriniň hataryna girýär. Olaryň hersiniň ýyllyk satuwy 70-den 80 müň awtoulaga çenli ýetýär. Ýokary islegiň fonunda käbir ulaglary gowşurmagyň möhletleri bir ýyldan geçýär, sargytlaryň bir bölegi bolsa öň ýatyrylypdy.
Kompaniýada awtoulaglaryň gaýtadan import edilmeginiň öz mümkinçilikleriniň çäginde işleýän ýapon zawodlaryna düşýän ýüki azaltmaga kömek etjekdigine garaşýarlar. Şol bir wagtyň özünde, Ýaponiýadaky önümçilik Taýwandaky önümçilik bilen bilelikde dowam etdiriler.
Toyota ýapon ýeňil awtoulag bazarynyň ýarysyndan gowragyny eýeleýär we 2025-nji ýyla çenli ýurtda 3,27 million awtoulag çykarmagy meýilleşdirýär. Kompaniýanyň prezidenti gowşurylyş möhletleriniň gijikdirilmegi bilen baglanyşykly ýagdaýy «çökgünlikli» diýip atlandyrdy we uzak garaşmagyň müşderileriň bäsdeşlere gitmegine sebäp bolup biljekdiginden howatyrlanýandygyny beýan etdi.
