Dünýä bazarynda şekeriň bahasynyň yzygiderli peselmegi we önümçilik çykdajylarynyň gymmatlamagy sebäpli, Çilide gant şugundyryny öndürmek tas 73 ýyldan soň bütinleý bes edilýär. Bu barada Reuters habar berdi.
Ýurtdaky gant şugundyryny gaýtadan işleýän ýeke-täk kärhana bolan Empresas Iansa kompaniýasy geljekki 2026/27-nji ýylyň möwsümi üçin daýhanlar bilen täze şertnamalary baglaşmajakdygyny yglan etdi. Bu bolsa ýurduň içinde bu ekin pudagynyň resmi taýdan soňuna gelendigini aňladýar.
Kompaniýanyň ýolbaşçylarynyň düşündirişine görä, dünýäde şekeriň bahasynyň örän peselmegi we şol bir wagtda dökünleriň, tehnikalaryň hem-de işçi güýjüniň bahasynyň yzygiderli gymmatlamagy gant şugundyryny ekmegi ykdysady taýdan bütinleý peýdasyz ýagdaýa getirdi.
