Tesla-nyň paýdarlary Ilon Maskyň 56 milliard dollar zähmet hakynyň paketini tassyklamak we elektrik awtoulag öndürijisiniň ýuridiki salgysyny Tehas şäherine geçirmek üçin ses berdiler. Bu barada kompaniýanyň baş direktorynyň sosial ulgamlarda çap eden habaryna salgylanýan Reuters habarlar gullugy ýazýar.
"Goldawyňyz üçin sag boluň!" – diýip, Mask X sosial ulgamynda ýazdy.
Ses berişligiň netijelerine görä, paýdarlaryň aglaba köplügi ABŞ-nyň korporatiw taryhynda iň uly zähmet hakyny tölemegiň şertlerini makullady. Bu makullama maýa goýujylaryň Maskyň kompaniýadaky geljegi baradaky aladalaryny aradan aýryp biler we elektrik ulag öndürijisini töleg paketini ýatyran kazyýetiň kararyny ýatyrmak ugrundaky göreşinde güýçlendirer.
Şeýle hem, Tesla-nyň paýdarlary iki geňeş agzasynyň - Ilon Maskyň dogany Kimbal Maskyň we Jeýms Merdokyň gaýtadan saýlanmagyny goldadylar.
Ses berişlik başlamazdan ozal ynanylan iri firmalar bolan Glass Lewis we Institutional Shareholder Services (ISS) paýdarlary töleg bukjasyny ret etmäge çagyrdylar, şol sanda Norwegiýanyň özygtyýarly baýlyk gaznasy ýaly, esasy maýadarlar garşy ses berjekdiklerini aýtdylar.
Şeýle-de bolsa, ses bermegiň netijesi gutarnykly bolup bilmez. Berkli ştatynyň Kaliforniýa uniwersitetiniň hukuk ugrundan professory Adam Badawi Delawer kazyýetiniň ses berişligi ykrar etmän hem biljekdigini belleýär.
Paýdarlaryň ýyllyk ýygnaga çenli öz kararlaryny üýtgedip biljekdigi bellendi.
Ozal Tesla-nyň direktorlar geňeşiniň başlygy Robin Denholmyň paýdarlara Ilon Maska garaşýan zähmet haky mukdary tölenmese, onuň kompaniýany terk edip biljekdigini duýdurandygyny ýatladýarys.
