Ilon Mask taryhda şahsy kapitalynyň möçberi 1 trillion dollardan geçen ilkinji adam boldy. «Reuters» habarlar agentliginiň mälim etmegine görä, bu SpaceX kompaniýasynyň paýnamalaryny Nasdaq biržasynda ilkinji gezek ýerleşdirmegi (IPO) netijesinde mümkin boldy.
IPO-nyň dowamynda her biriniň bahasy 135 dollardan jemi 555,6 million paýnama satyldy we munuň hasabyna 75 milliard dollar möçberde serişde toplanyldy. Bu görkeziji öz wagtynda biržadan 29,4 milliard dollar jemlemegi başaran Saudi Aramco kompaniýasynyň 2019-njy ýyldaky dünýä rekordyny täzeledi. Birža çykmagyň netijelerine görä, SpaceX kompaniýasynyň umumy işewürlik gymmaty, takmynan, 1,77 trillion dollar diýlip bahalandyrylýar.
Maskyň baýlygy nämeden ybarat?
«Reuters» agentliginiň hasaplamalaryna görä, häzirki wagtda Maskyň şahsy kapitalynyň esasy bölegini indi hut aerokosmos kompaniýasyndaky paýy emele getirýär. Onuň bu ýerdäki paýy 866–867 milliard dollar möçberinde bahalandyrylýar.
Şol bir wagtyň özünde, «The Washington Post» neşiriniň bellemegine görä, telekeçi häzirki wagtda diňe «kagyz ýüzünde» trillioner boldy. Çünki, onuň häzirki hasaplanan ägirt uly baýlygyna geljekde kompaniýa tarapyndan çylşyrymly wezipeler doly ýerine ýetirilen ýagdaýynda alynjak paýnamalar hem-de opsionlar öňünden hasaba alnyp goşuldy. Ol wezipeleriň hatarynda kosmosda täze maglumat merkezlerini işe girizmek we Marsda koloniýalary döretmek ýaly taslamalar bar. Şu uzak möhletli uly bonuslar hasaba alynmadyk ýagdaýynda, Maskyň hakyky kapitaly häzirki wagtda 1 trillion dollara sähel ýetenok.
SpaceX kompaniýasynyň IPO çäresinden öň, Ilon Maskyň umumy baýlygy, takmynan, 780 milliard dollar töweregi bahalandyrylýardy. Bu görkeziji dünýäniň iň baý adamlarynyň sanawynda ikinji setirde durýan Alphabet kompaniýasynyň esaslandyryjysy Larri Peýjiň baýlygyndan iki esseden hem köp diýmekdir. Ýatlap geçsek, bütin taryhyň dowamynda Maskdan başga 400 milliard dollarlyk serhetden diňe bir adam — Oracle korporasiýasynyň esaslandyryjysy Larri Ellison geçmegi başardy.
