Ilon Maska degişli bolan SpaceX aerokosmos kompaniýasy özüniň gymmatly kagyzlaryny ilkinji gezek biržada ýerleşdirmek (IPO) çäresini geçirdi. «Reuters» habarlar agentliginiň ýazmagyna görä, bu waka bütin dünýä taryhyndaky iň uly we rekord derejeli IPO boldy.
Onuň çäginde her biriniň bahasy 135 dollar bolan jemi 555,6 million sany adaty paýnama ýerleşdirildi we munuň hasabyna 75 milliard dollar serişde toplanyldy. Şeýlelikde, resmi taýdan Space Exploration Technologies Corp. diýlip atlandyrylýan kompaniýanyň umumy gymmaty 1,77 trillion dollar diýlip bahalandyryldy.
Mundan ozalky maliýe rekordy Saud Arabystanynyň Saudi Aramco döwlet nebit-gaz kompaniýasyna degişlidi. Ol 2019-njy ýylda birža çykyp, 29,4 mlrd dollar çekipdi.
Maliýe bazarynyň analitikleri kompaniýanyň birža çykyşyna gutarnykly baha bermekden entek irdigini aýdýar.
«Hakyky synag — geljekki birnäçe hepdede bazaryň bu IPO-ny nähili kabul etjekdigi we özleşdirjekdigi bolar» – diýip, Nýu-Ýorkuň 50 Park Investments kompaniýasynyň ýerine ýetiriji direktory Adam Sarhan belledi.
SpaceX kompaniýasynyň paýnamalarynyň resmi söwdalary şu gün, 12-nji iýunda Nasdaq biržasynda SPCX tikeri astynda başlar.
