Amerikanyň Itera startapy dünýäde ilkinji «suwuk» çap edilen plata diýip atlandyrylýan enjamynyň nusgasyny tanyşdyrdy.
Işläp düzüjileriň aýtmagyna görä, bu tehnologiýa elektron çyzgylaryň gurluşyny bir minutdan hem az wagtyň içinde üýtgetmäge mümkinçilik berýär. Şeýle-de ol enjamlary ýasamak we täze nusgalary synagdan geçirmek tapgyrlaryny 1000 esse çaltlandyrýar.
Bu oýlap tapyş elektrik arkaly çyglanma täsirine esaslanýar. Ulgam elektrik meýdanlarynyň kömegi bilen suwuk metal galyndylarynyň damjalaryny aýna gatlagyň üstünde mikron takyklygynda herketlendirýär. Bu bolsa inženerlere täze fiziki nusga ýasamazdan, köp gatlakly platalaryň ýollaryny we gurluşyny derrew üýtgetmäge şert döredýär.
Itera kompaniýasynyň ýolbaşçysy we esaslandyryjylarynyň biri Eý Jeý Kuper bu tehnologiýanyň elektronika önümçiliginiň wagtyny we çykdajylaryny azaltdjakdygyny mälim etdi. Onuň sözlerine görä, inženerler çyzgy üýtgeşmelerini girizip, gaýtadan geçirilýän synaglary dessine diýen ýaly amala aşyryp bilerler.
Kompaniýa «Upfront Ventures», «Costanoa Ventures» we «Colle Capital» ýaly gaznalardan 12 million dollar möçberinde maýa goýum çekendigini hem habar berdi. Bu serişdeler tehnologiýany söwda bazaryna çykarmak üçin sarp ediler.
Itera geljekde «Elektronika hyzmat hökmünde» (EaaS - Electronics as a Service) nusgasy boýunça işlemegi meýilleşdirýär. Sargyt edijiler enjamlaryň çyzgylaryny uzak aralykdan üýtgedip bilerler, ABŞ-ndaky ýörite synag merkezleri bolsa robotlaşdyrylan ulgamlaryň kömegi bilen suwuk metal ýollary awtomat usulda täzeden gurap, hakyky şaýlary duran ýerinde gurnap bererler.
