Türkmenistanda “Sagdyn maşgala - sagdyn nesil” atly sport bäsleşiginiň welaýat tapgyrlary geçirildi.
Türkmenistan Halkara habarlar merkeziniň habar bermegine görä, bäsleşik ilatyň arasynda sagdyn durmuş ýörelgelerini we bedenterbiýäni wagyz etmek, ýaşlaryň arasynda sporta bolan gyzyklanmany goldamak we höweslendirmek, sagdyn nesliň döremegine goşant goşmak maksady bilen geçirilýär.
Ýaryşlar Ahal, Balkan we Mary welaýatlarynyň häkimlikleriniň hem-de Türkmenistanyň Telewideniýe, radiogepleşikler we kinematografiýa baradaky Döwlet komitetiniň guramagynda maşgalalaryň arasynda geçirildi.
Ahal welaýat tapgyryna 8 maşgala, Balkan welaýat tapgyryna 4 maşgala, Mary welaýat tapgyryna bolsa 10 maşgala gatnaşdy.
Ýaryşyň dowamynda maşgalalar tanap çekişmek, dürli estafeta we beýleki ýaryşlar boýunça özara güýç synanyşdylar.
Toparlaryň atlary şu ýylyň “Pähim-paýhas ummany Magtymguly Pyragy” atly şygaryna laýyklykda saýlanyldy. Balkan welaýat tapgyrynda “Pähim” atly topar, Mary welaýat tapgyrynda bolsa “Bagtyýar” atly maşgala topary ýeňiş gazandy.
Ýeňijileriň we gatnaşyjylaryň ählisine degişli häkimlikleriň adyndan gymmatly sowgatlar gowşuryldy.
Bu çäräniň çäklerinde beýleki welaýatlar hem öz tapgyrlaryny geçirerler, jemleýji tapgyry bolsa 6-njy martda Aşgabat şäherinde geçiriler.
